Njauddâm vuuʹd saaʹmi siidsååbar pâʹsspeeiʹv 16.2.2020
Njauddâm vuuʹd saaʹmi siidsååbar ââʹnet pâʹsspeiʹvv 16.2.2020 ääʹljeeʹl čiâss 14.00 Čeʹvetjääuʹr škooulâst.
Saaʹmi siidsååbbar lij saaʹmi jânnamâkksaž vaaldšemriâšldõk. Saaʹmi siidsåbbar toiʹmmjummšest šiõtteet sääʹmlääʹjest (253/1995), koon täävtõssân lij viikkâd ooudâs sääʹmnarood da -vuuʹd jieʹlleemåårrmõõžžid da piʹrǧǧeemvuäittmõõžžid di juäʹtǩǩed da viikkâd ooudâs sääʹmkulttuur.
Siidsåbbrin vuässõõttmõš lij tääʹrǩes nuʹtt vaaldšemriâšldõõǥǥ toiʹmmjummuž ko äʹrbbvuõđ ooudâsviikkmõõžž diõtt. Siidsåbbar lie vaaldšemriâšldõõǥǥ ââʹlmõs tuʹmmstõktueʹjjeemorgaan da siidâst jälsteei saaʹmi aktiivlaz vuässõõttmõš såbbrid lij sijddsååbbar-riâšldõõǥǥ jieʹllem-mäinn.
Aaʹššid, koid såbbrest ǩiõttʼtõõlât:
– saaʹmi ouddoummuvaali vaal-luʹvddkååʹdd vuäzzlai vaʹlljummuš
– säʹmmlai tuõttvuõtt- da suåvâdvuõttkomissio komissaareʹtǩǩõõzzi noorrmõš di Njeäʹllem-Keväjääuʹr da Njauddâm vuuʹdi õhttsaž saaʹmi siidsåbbar jäʹrjstummuš
– ceâlkâlm ouddmõš Väʹččer poostvuuʹd håidd- da ââʹnnemplaanhämmsest
– Tâʹvv-Lappi mäddkåʹddkääʹvv 2040 -ehdtõs
– saaʹmi kueʹllšeellemkulttuuʹre õhtteei äʹrbbvuõtt-teâđ ruõkkmõš da ââʹnnem-määin
– jeeʹres ääʹšš
Siidsåbbar
Njauddâm da Njeäʹllem-Keväjääuʹr vuuʹdin jäʹrjstet siidsåbbar kuhttu vuuʹdin uuʹccmõsân õõut vuâra eeʹjjest. Siidsåbbrin ǩiõttʼtâʹlle eʹtǩǩõõzzid da ciâlklmid saaʹmi jieʹllemvueʹjjid da -åårrmõõžžid kuõskki veiddsõs da vuâđđjuurdlaz aaʹššin.
Mieʹrreemvääʹld siidsåbbrin vueiʹtte ââʹnned såbbra vuässõõtti tiuddâkksa siidâst põõššinalla jälsteei sääʹm da siʹjji pieʹllkueiʹm. Jõs såbbrest ǩiõttʼtõõllâm vuâlla åårrai äʹšš kuõskat jeeʹres oummu ouddõõzz leʹbe vuõiggâdvuõđid, lij suʹst peäggtum vueʹzzin vuäittmõš vuäʹssõõttâd såbbra da ââʹnned särnnamvääʹld toʹben.
Siidsååbbar lij mieʹrreemvääldlaz, ko pääiʹǩ âʹlnn lie 10 tiuddâkksa siidâst põõššinalla jäslteei sääʹm leʹbe siʹjji pieʹllkueiʹm.
Lââʹssteâđ: Saaʹmi ouddooumaž Veikko Feodoroff, teʹl. 050 396 1297