Nuõrttsääʹmkulttuurfondd

Siid kueʹtt -haʹŋǩǩõs

Siid kueʹtt -haʹŋǩǩõõzz čõõđ raʹjješ hirsskuäʹđ Čeʹvetjäurra

Haʹŋǩǩõõzz mieʹldd raʹjješ Čeʹvetjääuʹr siid kõʹsǩǩe, Saaʹmi Äʹrbbvuõttpõõrt ââlda hirsskuäʹđ, koʹst lie 35 mettarčiõkk-kõskkâd da liâdgg da koon puk sijddneeʹǩǩ vuäǯǯa ââʹnned. Sääʹmvuuʹd škoouʹlʼjemkõõskõõzz hirsskuurs mättʼtõõđi leʹjje viârrâm kuäʹđ hiirsid. Tän haʹŋǩǩõõzzâst kuäʹđ ciâggteš da raʹjješ samai valmmša: laakk, šâʹldd, traapp, tollpäiʹǩǩ, išttâmsââʹjj da påʹrdd di ikkân da uhss. Raajjâmäiʹǧǧ leäi 1.9.2017–31.12.2018. Haʹŋǩǩõs vuäǯǯai tuärjjõõzz 7798,84 euʹrred. Miõttum tuärjjõs leäi 65 prosentted haʹŋǩǩõõzz tuärjjeemvuâlas kuuʹlin.

Haʹŋǩǩõõzz täävtõõzz koʹlle Manner-Suomen Maaseudun ooudâsviikkâmprograʹmme 2014-2020, koon täävtõsân lij lââʹzzted jânnamvuuʹd jieʹllemviõǥǥ da jieʹllemšlaai pueʹreeʹl vuäittmõõžžid õhttsaž tuåimmjummže. Seämma ääiʹj haʹŋǩǩõõzz täävtõsân lij šõddeed piʹštti ooudâsviikkmõõžž lââʹzzteeʹl siid sosiaalaž ǩiõrddâmvuõđ. Siid kueʹtt –haʹŋǩǩõõzz täävtõsân leäi tuärjjad sääʹmkulttuur seillmõõžž da jieʹllemäärvaid de nääiʹt lââʹzzat siid õhttsažvuõđ da pueʹrad maaššmõõžž siidâst da sääʹmõhttsažkååʹddest.

Siid kueʹtt –haʹŋǩǩõõzz täävtõsân leäi vuäǯǯad Čeʹvetjääuʹr siʹjdde pukid õhttsaž vueiʹnnlõõttâmpääiʹǩ, koʹst vuäitt noorõõttâd, staarjõõttâd da ââʹnned juõʹǩǩnallšem šõddmõõžžid. Siidâst iʹlla nuõrid mii-ne noorõõttâmpääiʹǩ, a ååʹn nuõr vuäǯǯa ââʹnned tän kuäʹđ sij noorrmõõžži da staarjõõzzi vääras. Täävtõsân leäi tõt še, što kueʹtt veäʹǩǩat Saaʹmi Äʹrbbvuõttpõõrt šõddmõõžžid ååreeʹl håʹt mâka kaaʹfstõõllâmpäiʹǩǩ leʹbe sueʹjj ko šâdd âʹbrršõŋŋ. Täävtõsân leäi vuäǯǯad siʹjdde nåkam õhttsaž sââi, mii lij suåvlaž juõʹǩǩâkksaid, da mõõn vuäitt muʹtted taaʹrbi mieʹldd nuʹtt, što tõt veäʹǩǩat ânnʼjõž da puõʹtti šõddmõõžži riâššmõõžž åuggan.

Raajjmõõžž altteeš čõhččmannust 2017. Kuäʹđ vuåǯǯuš čõõuč ääiʹj pâʹjjlaaǥǥ vuâlla, de täʹlvvkuvddlõõzz ääiʹj jie tuejjääm ni mâiʹd. Ǩeâđđa 2018 raajjmõõžž eʹpet jueʹtǩǩeš, da kuäʹđ vaʹlddeš õnnu Aanar neäʹttel ääʹveem poodd mieʹldd Čeʹvetjääuʹrest 20.7.2018. Haʹŋǩǩõs viʹǩǩeš čõõđ jäänmõsân pääkkteʹmes ärtteltuâjjan. Jõnn späʹsseb tiʹjjid kook leeiʹd tuâjast mieʹldd.

Haʹŋǩǩõõzz mieʹldd Čeʹvetjääuʹr siʹjdde lij valmštõõvvâm mooččâs liâdggtum kuäʹđ, mõõn sijddneeʹǩǩ vuäiʹtte ââʹnned pirr eeʹjj. Kuäʹđest vaʹsttad Nuõrttsääʹmkulttuurfondd, kååʹtt oudd čooudid õõʹnnʼjid da vaʹsttad kuäʹđ takai huõlâst di liâdgglaaskin. Nuõrttsääʹmkulttuurfoond halltõs lij mieʹrrääm, što Čeʹvetjääuʹr vuuʹd škooulneeʹǩǩ da peiʹvvpõõrt päärna vuäǯǯa ââʹnned kuäʹđ määustää. Jeeʹres õõʹnnʼjin peʹrrjeet siõm ââʹnnem-määus kuäʹđ ââʹnnemkuuli käʹttem vääras.

Image
Image