Arkiv

Kategoria
June 4, 2018

Nuõrttsääʹmkulttuurfondd reäšš nuõrttsääʹmǩiõllsaž Lookkâmsilttõs -ǩeâlbbǩeeʹrjtõõzz

Lookkâmsilttõs -ǩeâlbbǩeeʹrjtõõzzi täävtõsân lij kaunnâd nuõrttsääʹmǩiõllsaž ǩeeʹrjteei da puʹhtted ouʹdde ođđ nuõrttsääʹmǩiõllsaž päärnai da nuõri ǩeeʹrjid. Juuʹrdmõsân lij vuäǯǯad ođđ, ânnʼjõžäiggsaž teeʹkstid, mõiʹd Nuõrttsääʹmkulttuurfondd čõõđat kärttuum ǩeʹrjjen.

Lookkâmsilttõs -ǩeâlbbǩeeʹrjtõõzz vuäʹpstõõzz

Nuõrttsääʹmkulttuurfondd reäšš tän ǩeâlb.

Ǩeeʹrjtemäiʹǧǧ lij 4.6.–30.9.2018

Ǩeeʹrjtemǩeâlbb lij pukid äävai. Ǩeâlbbǩeeʹrjtõs âlgg leeʹd päärnai da nuõri vääras ǩeeʹrjtum sääʹmǩiõllsaž teʹkstt, mõõn ij leäkku ääiʹjben čõõđtum. Ton vuäitak ǩeâšttjõõttâd õõutin leʹbe määŋgin teeʹkstin da vuäitak ǩeeʹrjted tõid ǩiõđin leʹbe mašinain. Teʹl ko jiõk silttâd ǩeeʹrjted säämas, vuäitak mainsted mainnsääd liânt ool säämas de tõn priimât ko mâka tõt lij aivv oođâs. Vueiʹvväʹššen lij teeʹkst siiskâž ij-ǥa tõt, što mõõn vuõiʹǧǧest tõt lij ǩeeʹrjtum. Nääiʹt nåkam oummu, kook jie võl silttee sääʹmǩiõl vuõiʹǧǧestǩeʹrjjtõõzz kuddnalla, vuäiʹtte še vuässõõttâd.

Pueʹrmõs teeʹkst vuäǯǯa pääʹlǩ: 1. cistt 500 euʹrred, 2. cistt 250 euʹrred, 3. cistt 100 euʹrred da 4–6 ciist 50 euʹrred. Täi lââʹssen pueʹrmõs teeʹkstid čõõđtet. Koumm oummu, koid Nuõrttsääʹmkulttuurfondd lij nõõmtam, vaʹlljee pueʹrmõs teeʹkstid. Vuõittji nõõmid iʹlmmtet 15.12.2018.

Vuässõõđak ǩiõlbbu vuõltteeʹl teeʹkstad ǩeâlbbääiʹj seʹst neʹttpååʹštin addrõʹsse kolttakulttuurisaatio@kolttasaamelaiset.fi leʹbe tuåimteeʹl tõn Nuõrttsääʹmkulttuurfoʹndde addrõõzzin Sevettijärventie 9080, 99930 Sevettijärvi. Neʹttpååšta âlgg piijjâd pââimõsân ”Kirjoituskilpailu”. Ǩeeʹrjet ǩeâlbbtekstta nõmmtiõđ, jeäʹl-ǥa jiijjâd nõõm. Piij tuu nõmmtiõđ tõn õhttuum teâttõʹsse, mõõn vuõlttääk neʹttpååʹštin, da ǩeeʹrjet neʹttpååšta jiijjâd õhttvuõtt-teâđaid. Ko tuåimtak teeʹkstad põʹmmai âʹlnn, piij teeʹkst mieʹldd konfeârt, mõõn ool ǩeeʹrjtak nõmmtiõđad da sizz cääǥǥak tuu õhttvuõtt-teâđaid. Teʹl ko jiõk pââʹst tuåimted teeʹkst põʹmmai ool ǩeeʹrjtum da täättak leântteed tõn, raauk veäʹǩǩvuõđ Nuõrttsääʹmkulttuurfoondâst, jõs jiõk muđoi piʹrǧǧed.

Ǩeâlbbteeʹkstid jeäʹt maacctuku, jie-ǥa tõid jeärben ärvvtõõlât. Ko vuässõõđak ǩiõlbbu, ooudak Nuõrttsääʹmkulttuurfoʹndde vuõiggâdvuõđ čõõđted da ââʹnned ǩeâlbbteeʹkstid jeeʹresnallšem õhttvuõđin.


Kategoria