Saaʹmi aazztummuž 75-eeʹjjprääʹznǩest määŋgpeällsaž programm

Saaʹmi aazztummuž 75-eeʹjjprääʹzneǩ prääʹzkjet Čeʹvetjääuʹrest, Keväjääuʹrest, Njeäʹllmest di Taar Njauddmest kueʹhtt neäʹttel ǩeeʹjjest 23.-25.8.2024. Prääʹzneǩ ââʹnet Pââʹzzteei Treffan Peäccamneeʹǩǩ pââʹzztem-määʹtǩ õhttvuõđâst.

Prääʹzneǩneäʹttel-lopp älgg piâtnâc 23.8. Čeʹvetjääuʹrest. Pââʹzzteei Treffan Peäccamneeʹǩǩ ceerkvest õnnum akatistoozz mâŋŋa Čeʹvetjääuʹr škooulâst jäʹrjstet prääʹzneǩ, koon prograammâst vaʹsttee škooulneeʹǩǩ. Prääʹznǩest lij mättʼtõõttikååʹdd kååʹffpäiʹǩǩ še. Piâtnâcjeäʹǩǩää Sevetin Baarist čuäʹjtâʹtte Jaakko Laitinen da Jouni J, šõddmõʹšše lij sizzpiâssâm-mähss.

Sueʹvet 24.8. prääʹzneǩneäʹttel-lopp juätkkai Taar Njauddmest. Toʹben ââʹnet mošttsluuʹžv oʹđđest čiõkkum pokoiniiʹǩǩi ääuʹd åʹrnn da čääʹccpââʹzztummuš Ǩeâuŋŋaz reeddast. Tõn mâŋŋa Äʹvv Saaʹmi Muʹzeeʹjest vuäitt tobdstõõttâd čuäjtõʹsse. Muʹzei šõddmõõžžâst čuäjtââtt Fossekallen-laauljoukk.

Pââʹzztem-mäʹtǩǩ juätkkai sueʹvet, ko Keväjääuʹrest Põõʹzzi Boris da Gleb ceessnest ââʹnet moʹlidvasluuʹžv di Njeäʹllem Pââʹss Koummõhttsažvuõđ da Pââʹzzteei Treffan Peäccamneeʹǩǩ ceerkvest ââʹnet jeäʹǩǩää vigilia. Wilderness Hotel Nellim jääʹrjast sueʹvetjeäʹǩǩää taansid.

Prääʹzneǩneäʹttel-loopp šuurmõs prääʹzniǩpeiʹvv lij pâʹsspeeiʹv 25.8. Njeäʹllmest Wilderness Hotel ǩeʹddmääʹrǩest. Peiʹvv älgg tueʹlää prääʹzneǩ-käđđsest õnnum liturgiain, koon mâŋŋa hoteeʹll restraantâst lij peiʹvvporrmõš. Prääʹznǩest vuäitt kuullâd saakkvuârai lââʹssen äʹrbbvuõđlaž da modeeʹrn sääʹm-musiikk di vueiʹnned kaʹdreeʹl. Prääʹzneǩ poott Suõmmkar-musikkjoouk konsertta. Suõmmkar õhttââll säʹmmlai musikkäʹrbbvuõđ modeeʹrn maaiʹlm-musiʹǩǩe da rock- di pop- musiʹǩǩe.

Prääʹzneǩpeeiʹv poodd prääʹzneǩvuuʹdest lij ohjjuum tåimmjummuš päärnaid di jeeʹresnallšem kaaupšem- da čuäjtõõllâmpaaiʹǩid. Prääʹzneǩvuuʹdest vuäitt tobdstõõttâd Kollʼješkuätt-jiõnntuejjõʹsse, koʹst kuulât pieʹǩǩid säʹmmlai jieʹllmest.

Prääʹzneǩ jäʹrjste Lappi ortodookslaž ceessansieʹbrrkåʹdd da Saaʹmi siidsååbbar õõutveäkka Sääʹmkulttuurfoondin, Äʹvv Sääʹm-muʹzeeʹjin da pääiklaž toiʹmmjeeʹjivuiʹm.

snimldõk | kuva: Ville-Riiko Fofonoff