Jiânnai oummu kuurniǩ-kuursâst

Čeʹvetjääuʹr sääʹmkultturneäʹttlest leʹjje mieʹldd jiânnai oummu. Kooumpeivvsaž neäʹttel-loopp šõddmuužžin leʹjje mieʹldd pääikla oummu da tuʹriiʹst. Ouddmiârkkân peʹssertuâjj- da täʹhtt-tuâjjkuursin mainsteš säämas, lääddas da eŋgglõsǩiõlin.

Jiânnai oummu puõʹtte sueʹvet mättʼtõõttâd, što mäʹhtt säʹmmla räʹjje kuuʹrniǩid. Tän saaʹmi vuäʹmm porrmõõžž leʹjje raajjmen da poorrmen pâʹjjel 30 ooumžed. Håʹt jeäʹp leäkku vuârddam nääiʹt jiânnai oummid tän kuʹrsse, vuõiti juõʹǩǩkaž kuuitâg raajjâd da njõõddčed kuuʹrnǩid.

Neʹlljdpeeiʹv leʹjje pukin jäänmõsân oummu puättam nueʹtted, kuvddled mainnsid da musiikk. Hueʹnes šõõŋŋâst huõlkani mieʹldd leʹjje nuʹtt 70 ooumžed. Håʹt nueʹtt ij ouddam jiânnai šilli, poorim kuitâǥ pašttum kueʹlid, bliinid da kaaʹff. Kuvddlim saaʹmi vuäʹmm mainnsid da Fossekalle laauljoouk mooččâs laulli.

Piâtnâc leäi Saaʹmi Äʹrbbvuõttpõõrt ǩeʹddmääʹrǩest riõššum õõutsââʹjest Sääʹm-muʹzefoondin hääʹsǩõõttmõõžž: päʹšttiim ǩiuggnest leeiʹb vuäʹmm maall mieʹldd da vuõinim, što mäʹhtt raʹjješ kaammisueiʹn. Toʹben vuõinim še, ko Čeʹvetjääuʹr škooulneeʹǩǩ siõʹrre kaʹdreeʹl.

Sääʹmkultturneäʹttlest siõʹrreš vuäʹmm maall siõrid da njuäʹrstiim ǩeâlbai. Taar Njauddâm vuuʹd histooʹr mainsteš da sääʹmdokumeentid čuäʹjteš še.

Vuâlpeäʹlnn lie snimldõõǥǥ kultturneäʹttlest.