Sääʹmkulttuurfondd

Sääʹmkultturfoond šeâttmõõžž

Sääʹmkultturfoond šeâttmõõžž

1 § Foond nõmm lij Sääʹmkultturfondd da dommpäiʹǩǩ Aanar.

2 § Foond jurddjen lij staanâd da viikkâd ooudâs sääʹmkulttuur.

3 § Fondd tuåimmai jurddjes mieʹldd håiddjeeʹl Aanar kååʹdd Čeʹvetjääuʹrest sääʹmkultturkõõskõõzz, staaneeʹl sääʹmkulttuur tiõđlaž tuʹtǩǩumuužž da teâđteeʹl tõn pohttmõõžžin, di raajeeʹl kultturõhttsažtuâi sääʹmvuuʹdest, dommjânnmest da meeraikõõskeld.

4 § Foond vuâđđkapitaalân lij 25.650 eeuʹr baŋkkruõkkmõš.
Foondâst lij vuõiggâdvuõtt väʹldded vuâstta sǩiâŋkaid, testameentid di lââʹzzted jällmõõžžes jeeʹresnalla še, ij kuuitâǥ kaaupšemnalla.

5 § Foond aaʹššid håidd da tõn eeʹttkâst halltõs, kååʹtt lij vaʹlljuum nellj eeʹjji ääiʹj da koozz kuʹlle ååuʹc vuässliʹžžed. Uuʹccmõsân vitt vuässla âʹlǧǧe leeʹd säʹmmla, kook lie šõddâmveärlaž Lääʹddjânnam meerla.

Halltõʹsse nõõmte Njauddâm vuuʹd saaʹmi sijddsååbbar, Njeäʹlle-Keväjääuʹr vuud saaʹmi sijddsååbbar, Sääʹmteʹǧǧ, Sámi Museum-sääʹm-muʹzeifondd, Sääʹmvuuʹd škoouʹljemkõõskõs, Aanar kåʹdd, Ortodokslaž ceerkav da Meäʹcchalltõs õõut vuässla. Tän lââʹssen halltõʹsse kååcat saaʹmi ouddooumaž, kååʹtt lij tuâjast tõn poodd. Teʹl ko vuässla ij leäkku mieʹrruum mieʹrrääiʹj sizz, halltõs vaʹlljad suu.

Halltõs vaʹlljad vuässlain saaǥǥtuõʹllʼjeei da vääʹrrsaaǥǥtuõʹllʼjeei nuʹtt, što saaǥǥtuõʹllʼjeejen vaʹlljeet säʹmmla.
Halltõs vuäitt piijjâd tuåimmkooʹddid di kåččad põõšši äʹšštobddjid.

6 § Saaǥǥtuõʹllʼjeei leʹbe ko son ij vueiʹt, vääʹrrsaaǥǥtuõʹllʼjeei kåčč halltõõzz såbbrõõššâd.

Sååbbarkåččmõõžž âlgg vuõltteed halltõsneeʹǩǩid mââimõsân čiččâm peeiʹv såbbar ooudpeäʹlnn.

Halltõs lij mieʹrreemvääʹldlaž, ko pääiʹǩ âʹlnn lie saaǥǥtuõʹllʼjeei leʹbe vääʹrrsaaǥǥtuõʹllʼjeei da nellj jeeʹres vuässla.

Tuʹmmstõõǥǥid tueʹjjeet õõutǩeârddsaž jiõni jeäʹnbõõzzin, teʹl ko täk šeâttmõõžž jie jeeʹresnalla mieʹrred. Teʹl ko jiõn mâʹnne tässad, räʹtǩǩeet vaal vuârbbeeʹl, leâʹša jeeʹres aaʹššin tuʹmmstõkkân vääʹldet tõn ehtõõzz, koon såbbar saaǥǥtuõʹllʼjeei še lij priimmâm.

Halltõõzz såbbrest âlgg raajjâd påʹrddǩeeʹrj, koon vuâllaǩeeʹrjte såbbar saaǥǥtuõʹllʼjeei da kuuitâǥ õhtt vuässlaž, koon halltõs lij tõn tuõjju vaʹlljääm.

7 § Foond nõõm ǩeeʹrjte halltõõzz saaǥǥtuõʹllʼjeei da väärrsaaǥǥtuõʹllʼjeei õõutsââʹjest leʹbe kuäbbaž-ne õõutsââʹjest jeeʹres halltõsneeʹǩǩin leʹbe foond veʹrǧǧneeʹǩǩin, ǩeän halltõs lij tõzz mieʹrrääm.

8 § Halltõs väldd taʹrbbes veʹrǧǧneeʹǩǩid da meärrad sij paaʹlǩid.

9 § Halltõõzz saaǥǥtuõʹllʼjeeja, vuässla da piizra vueiʹtet mäʹhssed mååžna sååbbarpääʹlǩ da jeeʹres foond ouʹdde tueʹjjuum tuâjast mååžna pääʹlǩ di tuõttlaž kuuli mieʹlddlaž korvvõõzzid mäʹtǩǩkuulin.

10 § Halltõs noorââtt eeʹjjsåbbar diõtt juõʹǩǩ eeʹjj njuhčč-ǩiđđmannust da čõhččsåbbar diõtt kålgg-skamm-mannnust.

Eeʹjjsåbbrest:
1) Naaneet halltõõzz tuåimmjem-mainnâz da teäʹǧǧââʹnnemčiõʹlǧǧtõõzz di ǩiõttʼtõõlât tiilltaʹrǩǩeempõʹmmai.
2) Ǩiõttʼtõõlât jeeʹres aaʹššid, koid halltõs pohtt ouʹdde.

Čõhččsåbbrest:
1) Mieʹrreet tuåimmjemplaan da täällarvvlõõzz diõtt puõʹtti eeʹjj vääras.
2) Mieʹrreet sååbbarpääʹlǩ meäʹr.
3) Vaʹlljeet puõʹtti eeʹjj vääras tiilltaʹrǩǩeei da suʹnne väärroummu.
4) Ǩiõttʼtõõlât jeeʹres aaʹššid, koid halltõs pohtt ouʹdde.

11 § Foond tiilleeʹǩǩ lij kaʹlndareeʹǩǩ. Teäʹǧǧââʹnnemčiõʹlǧǧtõõzz da halltõõzz mainnâz foond tuåimmjumuužžâst oouʹdab eeʹjj âʹlǧǧe uʹvdded täʹlvvmannu loopp mõõneeʹst tiilltaʹrǩǩeeja, kååʹtt âlgg uʹvdded suu mainnâz pâʹzzlâšttam-mannu loopp mõõneeʹst.

12 § Vuõiggân tuõđštum kuõrtõõzzid obblaaskââlm da balanss diõtt õhttõõzzivuiʹm, balanssjerrumuužžâst di tuåimmjem-mainnsest da teäʹǧǧââʹnnemčiõʹlǧǧtõõzzâst âʹlǧǧe tuåimmted Patentt- da registerhalltõʹsse ǩieʹssmannu loopp mõõneeʹst.

Teʹl ko halltõõzz vuässlaž da nõmmǩeeʹrjteei vaajtõʹvve, tõʹst âlgg samai sõrgg iʹlmmted Patentt- da registerhalltõõzz fonddregisteera.

13 § Foond šeâttmõõžžid vueiʹtet muʹtted, teʹl ko uuʹccmõsân kutt halltõsneeʹǩǩ tõn tätta. Šeâttmõõžži muttsa âlgg vuäǯǯad Patentt- da registerhalltõõzz naanumuužž.

Foond loopptemest mieʹrreet seämma riâššmõõžž mieʹldd.

14 § Teʹl ko mâka foond loopptet, tõn vaaʹrid ââʹnet foond halltõõzz mierrääm vueʹjjest šeâttmõõžži 2 §:sest sarnnum jurddja.