Sääʹmkulttuurfoond da Saaʹmi siidsåbbar tuejjla Dääʹrj põõrtâst mââibaarǥ 27.5.

Pueʹtted tiõrvân Njeäʹllma Dääʹrj põʹrtte mââibbarǥ 27.5. čiâss 11.00-15.30 kõõskâst saǥstõõllâd ääiʹjpoddsaž aaʹššin da kaaunõõttâd Sääʹmkulttuurfoond da Saaʹmi siidsåbbar tuejjlain

Vuäitak pueʹtted kaaunõttâd Sääʹmkulttuurfoond da Saaʹmi siidsåbbar tuejjlaivuiʹm Dääʹrj põʹrtte da saǥstõõllâd ääiʹjpoddsaž aaʹššin di jurddjin da vuârddmõõžžin Sääʹm kulttuurfoond da Saaʹmi siidsåbbar toiʹmmjummuž kuõskeeʹl. Saaʹmi siidsååbbar oudd še teâđ da vuäʹpstummuž õuddmiârkkân sääʹmlääʹjj meâldlaž veäʹǩǩvuõđi ooccmõʹšše da kueʹllǩiâmppaaʹššin.

Dääʹrj põõrtâst vuäitak kaaunõõttâd Sääʹmkulttuurfoond äʹššooumaž Anna-Katariina Feodoroffin, tällõs- da toiʹmmjemassisteʹntt Kaisja Semenojain da ǩiiđ 2025 ääiʹj älggam Sääʹmpääʹljes-haʹŋǩǩõõzz tuejjlain Mirkka Ollilain di Saaʹmi siidsåbbar piisar Terhi Harjuin.

Njeäʹllem Kerhopõõrtâst jäʹrjstet mââibaarǥ 27.5. čiâss 16.00 ääʹljeeʹl Aanar da Sör-Varanger kooʹddi õhttsaž Oummu rââst raaj – People cross the borders -haʹŋǩǩõõzz teâđtemšõddmõš, koozz Sääʹmkulttuurfoond da Saaʹmi siidsåbbar tuejjla vuässâʹtte še.

Čeʹvetjääuʹr Sääʹmpõrtt lij mââibaarǥ 27.5. ǩiđđ.