Sääʹmpääʹljes 2025–2026

Sääʹmpääʹljes – Čiõlǥtõs sääʹmǩiõl vueʹjjest lääʹdd õhttsažkååʹddest 2025–2026 -haʹŋǩǩõs lij täävtõõzzlaž čiõlǥtemhaʹŋǩǩõs, koon viiǥǥât čõõđ 28.4.2025–30.6.2026. Haʹŋǩǩõs lij vuäǯǯam teäggtõõzz Lääʹddjânnam Kulttuurfoond Harry Hendunen foondâst da haʹŋǩǩõõzz vaaldaš Sääʹmkulttuurfondd. Haʹŋǩǩõõzzâst reâugg projeʹktt-tuejjliʹžžen tuʹtǩǩeei Mirkka Ollila.

Sääʹmǩiõllsaž kääzzkõõzzi mõõnniäiggsaž positiivlaž ouddnummšest huõlǩani, ǩiõllââʹnnem areena lie õinn ooccanj: luâđla ǩiõllpirrõõzz lie tåʹlǩ siõmmna da ǩiõl kuâsttjemvuõtt da kollʼjemvuõtt lie rââʹžž. Lääʹdd õhttsažkååʹddest sääʹmǩiõl ââʹnnemvuäittmõõžž lie rääʹjtum da ǩiõl nâânummša õhttneei tååimaid šiõttʼtâʹlle täujja piõddgnõs teäggtõõzz. Histoorlaž da õhttsažkååddlaž tuejjeeʹji diõtt sääʹmǩiõllõutstõʹsse lie šõddâm määŋgnallšem vaʹǯǯtõõzz, kook vaigsmâʹtte ǩiõl jieʹllemviõkksiʹžžen seillmõõžž da ǩiõl luâđlaž serddjummuž.

Sääʹmpääʹljes-haʹŋǩǩõõzzâst čiõlǥtet nuõrttsääʹmǩiõl ââʹnnem oudldõõzzid lääʹdd da sääʹm õhttsažkååʹddest 2020-lååǥǥast. Čiõlǥtõõzz vuõigg täävtõssân lie vuäǯǯad obbkoov ǩiõllmainsteeʹjin, ǩiõllââʹnnemvueiʹttemvuõđin da -areenain di vuâmmšed tõid vaʹǯǯtõõzzid, cõgldõõzzid da tuejjeeʹjid, kook miâlǥee leʹbe câʹǧǧe ǩiõl serddjummuž, âânnmõõžž da jieʹllemviõkksiʹžžen põõššmõõžž. Haʹŋǩǩõõzzâst tuejjuum čiõlǥtõõzz vuâđald vuâmmšet tän poʹdde jäänmõsân vaaikteei da kriittlummus ǩiõlljeälltemtååimaid, da haʹŋǩǩõõzz looppâst põõrǥât viikkâd čõõđ måtam konkreettlaž tååim, koin ǩiõllvaʹǯǯtõõzzid vueiʹtet ǩieʹppeed tän poodd.

Čiõlǥtõõzzâst põõrǥât vuäǯǯad ǩiõlltuõjju vaaiktemvuõđ, što uuʹcces da piõdggnõs resuursid vueiʹtet ââʹnned nuʹtt-aa, što tõin vuäʒʒât jäänmõsân ääuʹǩ. Kuuʹǩǩab ääiʹj täävtõsân lij še kuuʹǩǩ kaiʹbbjum sääʹmǩiõl ǩiõlljeälltummuž kuʹǩes ääiʹj toiʹmmjemstrategia raajjmõš, koʹst čiõlǥtõs toiʹmmjeʹči šiõǥǥ vuâđđan strategiatuõjju.

Projeeʹkt viiǥǥât čõõđ sääʹmõutstõõzz seʹst ääuʹǩeeʹl õhttsažtuej jeeʹresnallšem čõõnâsjooukivuiʹm, koon lââʹzzen haʹŋǩǩõõzz tuej ohjjad ohjjeemjoukk. Ohjjeemjooukâst lie eeʹttkõsttum Sääʹmkulttuurfondd, Saaʹmi siidsååbbar, Lääʹddjânnam Sääʹmteʹǧǧ, vuõiggâdvuõttministeria, Sääʹmvuuʹd škooultemkõõskõs, Sääʹm psykososiaalʼlaž tuärj juâǥǥas Uvjj, Äʹvv – Saaʹmi muʹzei, Sääʹm Ǩiõllkaʹlddi da Giellgas-institutt.

Lââʹssteâđ:

Mirkka Ollila, Sääʹmpääʹljes-haʹŋǩǩõõzz projeʹktt-tuejjlaž
mirkka.ollila@k olttasaamelaiset.fi, teʹl. 050 371 8827

Anna-Katariina Feodoroff, Sääʹmkulttuurfoond äʹššooumaž
anna-katariina.feodoroff@kolttasaamelaiset.fi, teʹl. 050 364 6249