Sääʹmkulttuurfondd lij õlmstââttam sääʹmǩiõllsaž seiʹnnkaʹlndaar 2026
Sääʹmkulttuurfoond sääʹmǩiõllsaž seiʹnnkaʹlndar 2026 lij iʹlmstõõvvâm. Sääʹmkulttuurfondd späʹssbââšš Antti Pentikäinen, Oulu ortodookslaž aaʹrhelkåʹddfoond di Sääʹm-museo Siida, kook lie vueiʹtlvâsttam kaʹlndaar õlmstâttmõõžž. Kaʹlndar lij puuʹtʼtum Antti Pentikäinen šõddâmpeiʹvvnoorõõzz vaaʹri di Oulu ortodookslaž aaʹrhelkåʹddfoond tuärj veäkka.
Eeʹjj 2026 seiʹnnkaʹlndaar teeʹmmen lij repatriaatio da kaʹlndar lij vikkum čõõđ õhttsažtuejast Sääʹm-museo Siidain. Sääʹmkulttuurfondd vaʹsttii kaʹlndaar teäʹddmest, kuâsttjõõzzâst da sääʹmǩiõllsaž siiskõõzzin di puätt vaʹstteed kaʹlndaar jueʹǩǩmest. Siida lij puuʹtʼtam kaʹlndra snimldõõǥǥid da snimldõkteeʹkstid di sättsaaʹnid repatriaatiost da tõn miârktõõzzâst. Kaʹlndaar sääʹmkääuʹn lie vaʹlljuum õõutveäkka Sääʹm-museoin Sääʹmkulttuurfoond eʹtǩǩõõzzi vuâđald. Siida teeʹksti lââʹzzen kaʹlndrest lie teeʹkst Sääʹmkulttuurfoondâst da Saaʹmi siidsåbbrest. Kaʹlndaar snimldõõǥǥ poʹhtte õuʹdde nuʹtt saaʹmi historia ko še ǩiõtt-tuejjtääid reeʹǧǧesvuõđ.
Kaʹlndar puätt jueʹǩǩemnalla Čeʹvetjäurra, Njeällma, Âʹvvla, Heʹlssna, Ruäʹvnjaʹrǧǧe, Äʹvv-muʹzeeja Njauddma di tõn vuäitt še tiʹllʼjed pååʹšt mieʹldd. Lââʹzzen kaʹlndaar vuäitt vuäʹstted Sääʹmkulttuurfoondâst leʹbe Sääʹm-museo Siidast (rääʹjtum mieʹrr). Sääʹmkulttuurfoondâst kaʹlndaar vuäitt vuäʹstted Sääʹmpõõrtâst (20 € / kpl) leʹbe pååʹšt mieʹldd (20 € / kpl + tååimtemkuul). Puåttjid ââʹnnep Sääʹmkulttuurfoond toiʹmmjummuž tuärjjummša.
Mâʹte õuddâl, kaʹlndrest lie mieʹldd eeʹjj 2026 ortodookslaž pââʹzz di säʹmmla da läʹddla liipptempeeiʹv. Sääʹmnõmmpeeiʹv lie ortodookslaž nõmmpeiʹvvkaʹlndaar meâldlânji. Mâʹte teimma še, kaʹlndrest kuâsttje teâđ mannu pooddin di kuäʹss vuäitt pueʹrmõsân poppeed kueʹl. Lij tuõttum, što määŋgi kueʹli liikkummuš lij čõnnum mannu pooddid.
Seiʹnnkaʹlndar lij sǩiâŋkk mij saaʹmid di nääiʹt âʹte saaʹmid määustem.
Kaʹlndaar määusteʹmes jueʹǩǩem saaʹmid 10.12.2025 ääʹljeeʹl:
- Njeäʹllem
Njeäʹllmest kaʹlndaar vuäǯǯ Sääʹmkulttuurfoond halltõõzz saaǥǥjååʹđteei Heidi Hännisest vääʹldeeʹl õhttvuõđ +358 50 517 3891
- Âʹvvel
Oummu rââst raaj -haʹŋǩǩõõzz konttrest (Piiskuntie 5, 99800 Âʹvvel. Leäkku õhttvuõđâst õõudǩiõʹtte Oummu rââst raaj -haʹŋǩǩõõzz projeʹkttjååʹđteei Joni Gauriloʹffe joni.gauriloff@inari.fi / +358 40 574 2143.
Hoʹhsse! Koontâr iʹlla äävai 22.12.2025–6.1.2026
- Heʹlssen
Heʹlssnest kaʹlndaar vuäǯǯ Sääʹmkulttuurfoond halltõsneǩ Maarit Kiprianooffâst vääʹldeeʹl õhttvuõđ +358 45 633 6336
- Čeʹvetjäuʹrr
Sääʹmkulttuurfoond konttrest Sääʹmpõõrtâst (Sevettijärventie 9080, 99930 Čeʹvetjäuʹrr) vuõssargg-seärad č. 11–16 kõõskâst. Vuäitak leeʹd še õõudǩiõʹtte õhttvuõđâst info@kolttasaamelaiset.fi / +358 50 364 6249
Hoʹhsse! Koontâr iʹlla äävai 22.12.2025–6.1.2026
- Pååʹšt mieʹldd
Vääʹld õhttvuõđ neʹttpååʹšt pääiʹǩ info@kolttasaamelaiset.fi. Iʹlmmet saaǥǥâst tiʹllʼjak-a määusteʹmes kaʹlndaar avi leäk-a vuäʹsttmen kaʹlndaar. Iʹlmmet saaǥǥâst še nõõm da pååʹštaddrõõzz, meäʹr di ǩeäʹzz/ǩeäiʹd tiʹllʼjak kaʹlndaar, jõs tiʹllʼjak määusteʹmes kaʹlndaar.
- Äʹvv – Saaʹmi Muʹzei (12.12.2025 ääʹljeeʹl)
Muʹzei äävaiåårramääiʹji seʹst addrõõzzâst Neidenveien 3828, N-9930 Njauddâm
- Ruäʹvnjaarǥ jueʹǩǩemteâđaid peeiʹvtep mâʹŋŋlakast.
Määusteʹmes kaʹlndaar vuäǯǯak, ko iʹlmmtak nõõmad. Jõs viiǯǯak kaʹlndaar järrsid še, iʹlmmet viǯǯâm õhttvuõđâst ǩeäʹzz/ǩeäiʹd viiǯǯak kaʹlndaar. Norrum teâđâid jeäʹp uuʹd õõudårra da jaukkeep teâđaid eeʹjj 2026 looppâst.
Kaʹlndaar kaaupšem 10.12.2025 ääʹljeeʹl
- Čeʹvetjäuʹrr
Sääʹmkulttuurfoond konttrest Sääʹmpõõrtâst (Sevettijärventie 9080, 99930 Čeʹvetjäuʹrr) vuõssargg-seärad č. 11–16 kõõskâst. Vuäitak mäʹhssed tieʹǧǧin leʹbe koortin.
Hoʹhsse! Koontâr iʹlla äävai 22.12.2025–6.1.2026
- Pååʹšt mieʹldd
Vuäitak tiʹllʼjed kaʹlndaar domoi vuõltteeʹl neʹttpååʹšt addrõʹsse info@kolttasaamelaiset.fi. Iʹlmmet tiʹllʼjummuž õhttvuõđâst, kâʹll kaʹlndaar tiʹllʼjak, nõõm, pååʹštaddrõõzz da teʹlfon-nââmar. Kaʹlndaar mieʹldd vuõltteep laask tiʹllʼjõõzzâst. Tiʹllʼjõõzz hâʹdd lij 20 € / kpl + tååimtemkuul (Lääʹddjânnmest n. 5 € / 1 kaʹlndar).
- Sääʹm-museo Siida (16.12.2025 ääʹljeeʹl)
Inarintie 46, 99870 Aanar. Sääʹm-museo Siidast kaʹlndaar lie kaaupšemnalla rääʹjtum mieʹrr 16.12.2025 ääʹljeeʹl.