Siid kueʹtt

Siid kueʹtt leʹbe Kylän kota -haʹŋǩǩõõzzâst valmštõõvi Saaʹmi Äʹrbbvuõttpõõrt ââlda sijddniiʹǩǩi õhttsaž ââʹnnmõʹšše 35 mettarčiõkk-kõõsk, liâdggtum da pirrekksaž âânnma šiõttlõs hirsskueʹtt. Raajjmõõžž altteeš čõhččmannust 2017 da kuäʹđ pââʹzzteš âânnma Aanarneäʹttli ääʹveempoodd õhttvuõđâst Čeʹvetjääuʹrest 20.7.2018.

Kuäʹđ raajâs lij rajjum Sääʹmvuuʹd škooultemkõõskõõzz hirssraajjâmkuursâst mättʼtõõttituejjan. Haʹŋǩǩõõzz čõõđviikkâmäiʹǧǧ leäi 1.9.2017–31.12.2018, da haʹnǩǩõõzz täävtõõzz leʹjje vueʹss Maadd-Lääʹddjânnam (Manner-Suomi) Mäddvuuʹd õõudâsviikkâmprograamm2014–2020: haʹŋǩǩõõzz täävtõsân leäi lââʹzzted mäddvuuʹd jieʹllemviõǥǥ da jieʹllemkvaliteeʹtt pueʹreeʹl vueiʹttemvuõđid õhttsaž toiʹmmjummša di seämmast čõõđviikkâd ǩeâllʹjeei ouddnummuž lââʹzzteeʹl sijddõutstõõzz sosiaalʼlaž ǩeâllʼjemvuõđ. Siid kueʹtt -haʹŋǩǩõõzz täävtõsân leäi tuärjjeed sääʹmkulttuur seillmõõžž da jieʹllemviõkkvuõđ õhttsallašvuõđ lââʹzzteeʹl da pueʹreel maaššâmvuõđ siidâst da sääʹmõutstõõzzâst.

Siid kueʹtt toiʹmmai Čeʹvetjääuʹr siid õhttsallaš da vueʹllǥaž kõddâz kaaunõõttâm-, staarjõõttâm- da šõddmõšpäiʹǩǩen. Kuäʹđ täävtõsân lij tuärjjeed še Saaʹmi Äʹrbbvuõttpõõrt šõddmõõžžid taʹrjjeeʹl õuddmiârkkân kååʹffstõõllâmpääiʹǩ da âʹbrrsuej. Sääʹmkulttuurfondd vaaldaš kuäʹđ, da vaʹsttad kuäʹđ čouddjin, liâdggmääusain da kuäʹđ takai kuddân âânnmõõžžâst.

Pääiklaž õutstõõzz (jm. škooul, ouddpeâmm, paalǥâskååʹdd da liikkeemsieʹbrr) vueiʹtte ââʹnned kuäʹđ määustaa jiiʹjjez toiʹmmjummuž leʹbe aalmjallaš šõddmõõžži vääras. Siid kueʹtt lij määustem ortodookslaž sieʹbrrkådda še sieʹbrrkåʹddpõõrt koʹrvveei päiʹǩǩen. Jeeʹres õõʹnnʼjin peʹrrjet uuʹcces ââʹnnem-määus ǩuäʹđ tuõʹllʼjemkuuli mäʹhssem diõtt.