Saaʹmi meersažpeeiʹv Čeʹvetjääuʹrest riõʹššeš puõccin vuejjmuužž da suäʹbbpuõccui ǩeâlbaivuejjmuužž
Nuõrttsääʹmkultturfondd da Čeʹvetjääuʹr škooul rieʹšše 6.2.2014 saaʹmi meersažpeeiʹv šõddmõõžžid. Vuõššân kaʹǧǧeš liipp laauleeʹl sääʹmsooǥǥ laulli. Tõn mâŋŋa päärna raʹjje suäʹbbpuõccuid kâârvtem-maateriaalin ââʹneeʹl vuäʹmm sookkaid vueiʹvi vääras da čuõppeeʹl peeʹlljid vuäʹmm čåuʹddkähttnest.
Ko suäʹbbpuõccu leʹjje rajjum valmmša, õʹnneš ǩeâlbaivuejjmuužž, koʹst leʹjje mieʹldd päärna da vuõrâs oummu kueiʹtin jooukin. Tõn mâŋŋa siõʹrreš vuäʹmm saaʹmi siõrid, nueʹrrsiõr da suõrmâs-siõr.
Juha Feodoroff da Clovis Guilloton leʹjje pohttam puõcceez Hamlet, Nappi da Baby. Tõivuiʹm pieʹššeš vuejčed. Tõʹst päärna čuuʹt tuʹǩǩee. Mââimõsân sij võl vuõǯǯu uʹvdded puõccid jeäkkal da koškkuum lõsttriiʹssid.
Meersažpeeiʹv riõʹššeš Čeʹvetjääuʹr škooul šeelljast. Šõŋŋ leäi šiõǥǥ da jiânnai oummu leʹjje puättam mieʹldd.
