Saaʹmi ouddoummuvaali võboršiiʹǩǩi piijjmõš älgg sueiʹnnmannu peäʹlrääʹjest

Võboršiiʹǩǩi piijjmõš eeʹjj 2020 saaʹmi ouddoummuvaalid älgg 15.7. da poott 15.8. čiâss 12.00.

Saaʹmi ouddoummuvaal ââʹnet pâʹsspeeiʹv 20.9. Vaalin vaʹlljeet saaʹmi ouddoummu poʹdde 1.1.2021 – 31.12.2023.

”Saaʹmi ouddoummuvaali jäʹrjstummšest vääʹldet lokku koronavirusvueʹjj da valmštõõđat tõõzz, što äiʹǧǧtaaul vueiʹtet šiõtteed vueʹjjest šõõddi muttsi mieʹldd.”, ceälkk vaal-luʹvddkååʹdd saaǥǥjååʹđteei Hanna-Maaria Kiprianoff.

Sääʹmlääʹjj 48 § nuuʹbb pääiʹǩ mieʹldd ouddoummuvaalin jiõnstemvuõiggâdvuõttneeʹǩǩ lie Aanar kååʹddest 51 peiʹvved ouddâl vaalpeeiʹv jälsteei tiuʹddvälddsaž sääʹm da sij pieʹllkueiʹm. Vaalin jiõnstemvuõiggâdvuõttniiʹǩǩi loǥstõõǥǥ lie tääʹrǩstemnalla 15.8. – 20.9.

Vaal-luʹvddkååʹdd åålǥpeällsaž äʹšštobddijoukk tääʹrǩast tän eeʹjj saaʹmi ouddoummuvaalin pukin võboršeʹǩǩen pijjum oummin vaalââʹntemvuõđ nuõrttsääʹmǩiõl ǩiõlltääid peäʹlest.

“Äʹšštobddijooukâst lie nuõrttsääʹmǩiõl siltteei. Vaalââʹntemvuõđ tääʹrǩstet seämma peeiʹv, ko võboršiiʹǩǩi piijjmõš lij puuttam.”, mušttal Kiprianoff.

Saaʹmi ouddoummuvaal vaʹlljeemõhttõõzz aalǥtemäʹššǩiiʹrjid ouʹdde Saaʹmi siidsåbbar koontâr Čeʹvetjääuʹrest, vaal-luʹvddkååʹdd saaǥǥjååʹđteei Hanna-Maaria Kiprianoff Čeʹvetjääuʹrest da vaal-luʹvddkååʹdd väärrsaaǥǥjååʹđteei Tauno Haltta Njeäʹllmest.

Lââʹssteâđ: vaal-luʹvddkååʹdd saaǥǥjååʹđteei Hanna-Maaria Kiprianoff, teʹl. 040 821 5157