Saaʹmi siidsåbbar Čeʹvetjääuʹrest da Njeäʹllmest täʹlvvmannust
Njauddâm vuuʹd saaʹmi siidsååbbar ââʹnet sueʹvet 20.2.2021 ääʹljeeʹl čiâss 15.00 Čeʹvetjääuʹr škooulâst. Njeäʹllem-Keväjääuʹr vuuʹd saaʹmi siidsååbbar ââʹnet pâʹsspeeiʹv 21.2.2021 ääʹljeeʹl čiâss 13.00 Njeäʹllem sieʹbrpõõrtâst.
Ođđ toiʹmmjempââʹj vuõssmõs siidsåbbrin vaʹlljeet sääʹmsuåvtõõzzid Njauddâm da Njeäʹllem-Keväjääuʹr vuuʹdid pâjja 2021-2023. Kuhttu suåvtõʹsse vaʹlljeet nellj vuäzzla da kueʹhtt väärrvuäzzla. Kuhttu siidsåbbrin vaʹlljeet še eeʹttiǩ Sääʹmkulttuurfoond halltõʹsse pâjja 2021-2024. Lââʹssen såbbrest ǩiõttʼtõõlât säʹmmlai tuõttvuõtt- da suåvâdvuõttkomissio aaʹššid di jeeʹres ääiʹjpoddsaž aaʹššid.
Såbbri jäʹrjstummšest vääʹldet lokku koronavirus pâššnummuž cõggmõš. Såbbrin jääʹǩǩtet Tiõrvâsvuõđ da pueʹrrvââjjam stroiʹttel da mäʹttem- da kulttuurministeria uʹvddem vuäʹppõõzz staankõõskin da hygieniavueʹjjin.
Saaʹmi siidsååbbar lij saaʹmi äʹrbbvuõđlaž vaaldšemriâšldõk. Saaʹmi siidsåbbar toiʹmmjummšest šiõtteet sääʹmlääʹjest (253/1995), koon täävtõssân lij viikkâd ooudâs sääʹmnarood da -vuuʹd jieʹlleemåårrmõõžžid da piʹrǧǧeemvuäittmõõžžid di juäʹtǩǩed da viikkâd ooudâs sääʹmkulttuur.
Siidsåbbar lie vaaldšemriâšldõõǥǥ ââʹlmõs tuʹmmstõktueʹjjeemorgaan da siidâst jälsteei saaʹmi aktiivlaž vuässõõttmõš såbbrid juätkk sijddsååbbar-riâšldõõǥǥ ooudâs.
Siidsåbbar
Njauddâm da Njeäʹllem-Keväjääuʹr vuuʹdin jäʹrjstet siidsåbbar kuhttu vuuʹdin uuʹccmõsân õõut vuâra eeʹjjest. Siidsåbbrin ǩiõttʼtâʹlle eʹtǩǩõõzzid da ciâlklmid saaʹmi jieʹllemvueʹjjid da -åårrmõõžžid kuõskki veiddsõs da vuâđđjuurdlaž aaʹššin.
Mieʹrreemvääʹld siidsåbbrin vueiʹtte ââʹnned såbbra vuässõõtti tiuddâkksa siidâst põõššinalla jälsteei sääʹm da siʹjji pieʹllkueiʹm. Jõs såbbrest ǩiõttʼtõõllâm vuâlla åårrai äʹšš kuõskat jeeʹres oummu ouddõõzz leʹbe vuõiggâdvuõđid, lij suʹst peäggtum vueʹzzin vuäittmõš vuäʹssõõttâd såbbra da ââʹnned särnnamvääʹld toʹben.
Siidsååbbar lij mieʹrreemvääldlaž, ko pääiʹǩ âʹlnn lie 10 tiuddâkksa siidâst põõššinalla jälsteei sääʹm leʹbe siʹjji pieʹllkueiʹm.
Lââʹssteâđ: Saaʹmi ouddooumaž Veikko Feodoroff, teʹl. 050 396 1297
Saaʹmi siidsååbbar | Kolttien kyläkokous