Sääʹmsuåvtõõzz ǩiõttʼtâʹlle Saaʹmi siidsåbbra tueʹjjuum eʹtǩǩõõzzid säʹmmlai tuõttvuõtt- da suåvâdvuõttkomissio vuäzzliʹžžen rosttovmannust
Saaʹmi siidsååbbar da Sääʹmteʹǧǧ rauʹǩǩe eʹtǩǩõõzzid säʹmmlai tuõttvuõtt- da suåvâdvuõttkomissio vuäzzliʹžžen leʹbe komissaarân vueʹssmannu 17. peivva mõõneeʹst. Mieʹrräigga mõõneeʹst puõʹtte õhttsiʹžže 16 eʹtǩǩõssâd, kueʹhtt Saaʹmi siidsåbbra da 14 Sääʹmtegga.
Kuhttu Saaʹmi siidsåbbra tueʹjjuum eʹtǩǩõõzzâst eʹtǩǩeeš vaaldšemtiõʹđi maister Irja Jefremooff säʹmmlai tuõttvuõtt- da suåvâdvuõttkomissio vuäzzliʹžžen. Eʹtǩǩeei leʹjje Pauliina Feodoroff da Vladimir Feodoroff di Tiina Sanila-Aikio, Anna Lumikivi da 38 jeeʹres vuâllaǩeeʹrjteei.
Ouddâl eʹtǩǩõõzzi raukkmõõžž Njeäʹllem-Keväjääuʹr da Njauddâm vuuʹdi saaʹmi siidsåbbar leʹjje tuʹmmjam, što eʹtǩǩõõzzid puuʹtet ǩiõttʼtõõllâmnalla vuuʹdi õhttsaž saaʹmi siidsåbbra, koʹst tuʹmmjet õõut komissaar eʹtǩǩummšest riikksuåvtõʹsse. Koronavirusvueʹjj diõtt Saaʹmi siidsåbbra tueʹjjuum komissaareʹtǩǩõõzzid ǩiõttʼtõõlât õhttsaž siidsåbbar sââʹjest rosttovmannust Njeäʹllem-Keväjääuʹr da Njauddâm vuuʹdi sääʹmsuåvtõõzzi õhttsaž såbbrest.
”Obb sääʹmvuuʹd õhttsaž äävai siidsåbbar jäʹrjstummuš ij leäkku tän vueʹjjest vueiʹtlvaž, nuʹtt što tåimmamnääʹll lij jeeʹres ko ooudǩiõʹtte leäi tuʹmmjum. Sääʹmsuåvtõõzz tuʹmmje ääʹššest sääʹmlääʹjj meâldlânji. Saaʹmin lij vuäittmõš ouddâl sääʹmsuåvtõõzzi såbbar čuäʹjted vuäinnmõõžžeez komissaar vaʹlljummšest. Nääiʹt vueiʹttep täʹǩǩeed äävaivuõđ da tuõđted sääʹmõutstõõzz naʹddjõõzz. Puättam vuäinnmõõžžid ǩieʹssep õʹhtte tuʹmmstõktuâj tuärjjan sääʹmsuåvtõõzzid.” saaʹmi ouddooumaž Veikko Feodoroff mušttal.
Tuõttvuõtt- da suåvâdvuõttproseeʹss mieʹrren lij aiccâd da ärvvtõõllâd historiallaš da ânnʼjõž čårstummuž, mieʹldd looǥǥeeʹl riikk suddeempolitiikk, di vuõiggâdvuõđi neuʹrrummšid, čiõlǥted mäʹhtt täk vaaikte säʹmmlaid da sij õõutstõʹsse ânnʼjõž vueʹjjest da eʹtǩǩeed, mäʹhtt vuäitčeš oouʹdeed õhttvuõđ säʹmmlai da Lääʹddjânnam riikk kõõsk di säʹmmlai kõõskâst.
Komissiost âʹlǧǧe leeʹd vuäzzla, koin lij spesiaalsilttummuš säʹmmlai jeälain, ǩiõlâst da kulttuurâst. Komissiost lie vitt komissaar, koin kueʹhtt vaʹlljeet riikksuåvtõõzz eʹtǩǩõõzzâst, kueʹhtt Sääʹmteeʹǧǧ eʹtǩǩõõzzâst da õhtt Saaʹmi siidsåbbar eʹtǩǩõõzzâst.
Peäʹlestvälddmõõžžid sääʹmsuåvtõõzzid raaukât eʹtǩǩeed 6.12.2020 mõõneeʹst teʹlfoon leʹbe neʹttpååʹšt mieʹldd:
- Saaʹmi ouddooumaž Veikko Feodoroff, teʹl. 050 396 1297
- Saaʹmi siidsåbbar koontâr, teʹl. 040 715 3680, kolttien.kylakokous(at)saamisiidsaabbar.fi