Sääʹmsuåvtõõzzid da väärrouddoummu lie vaʹlljuum ânnʼjõž tåimmpâjja

Tälvvmannu beäʹlnn õnnum saaʹmi siidsåbbrin vallʼjeeš ođđ sääʹmsuåvtõõzzid koumm eeʹjj piʹštti tåimmpâjja, eeʹjj 2026 loopp räjja. Sääʹmsuåvtõõzz norrõʹtte vuõssmõs såbbra tälvvmannu looppâst.

Njeäʹllem-Keväjääuʹr vuuʹd sääʹmsuåvtõõzz vuäzzliʹžžen vaʹlljeeš Joni Gauriloff, Heidi Hänninen, Virve Multasuo da Teemu Titola di väärrvuäzzliʹžžen Jonne Fofonoff da Marko Ronkainen. Njauddâm vuuʹd sääʹmsuåvtõõzz vuäzzliʹžžen vaʹlljeeš Anna-Katariina Feodoroff, Hanna-Maaria Kiprianoff, Tapio Kiviniemi da Jarno Mäki di väärrvuäzzliʹžžen Natalia Sanila-Koskinen da Jasmin Semenoff.

Sääʹmsupvtõõzz norrõʹtte vuõssmõs õhttsaž såbbra 26.2.2024 Aanrest. Vuõssmõs såbbrestes sääʹmsuåvtõõzz ǩiõttʼtõʹlle ciâlkâlm- da nõõmtemraukkmõõžžid di vallʼjee tåimmpâjja väärrouddoummu, kååʹtt sääʹmlääʹjj 46 §:ff meâldlânji håidd saaʹmi ouddoummu tuâjaid teʹl ko ouddooumaž lij cõggnam leʹbe cõggneei. Väärrouddooumžen vallʼjeeš Saaʹmi siidsåbbar piisar Terhi Harju. Harju lij tåimmam väärrouddooumžen tåimmpõõʹjin 2018-2020 da 2021-2023 še.