Saaʹmi siidsåbbar noorrâʹtte õhttsaž såbbra vuõssmõs vuâra
Njeäʹllem-Keväjääuʹr da Njauddâm vuuʹdi saaʹmi siidsåbbri õhttsaž sååbbar jäʹrjstet sueʹvet 27.9.2025. Såbbrest linjjeet sääʹmlääʹjj 9 §:ff miõttmõõžž vuâđđjurddjin di saǥstõõlât koltta-sääʹn âânnmõõžžâst.
Čõhččmannu looppâst jäʹrjstet pâiʹlmeärrsaž, Njeäʹllem-Keväjääuʹr da Njauddâm vuuʹdi saaʹmi siidsåbbri õhttsaž sååbbar Aanrest. Såbbrest linjjeet sääʹmlääʹjj 9 §:ff meâldlaž kueʹllǩeâmppooccmõõžži miõttmõõžž vuâđđjurddjin. Ääʹššest saǥstõʹlleš tän eeʹjj täʹlvvmannust jäʹrjstum siidsåbbrin da Njauddâm vuuʹd siidsååbbar mieʹrrii teʹl, što sääʹmsuåvtõõzz ǩiõttʼtâʹlle kuhttu siidsåbbar eʹtǩǩääm linnjõõzzid, koon mâŋŋa tõid puuʹtet tän eeʹjj peäʹlnn siidsåbbrid priimmâmnalla.
– Sääʹmsuåvtõõzz mieʹrree mâŋŋa ko leʹjje ǩiõttʼtõõllâm siidsåbbri eʹtǩǩääm linnjõõzzid, što pâiʹlmeärrsaž siidsåbbar jäʹrjstet Njeäʹllem-Keväjääuʹr da Njauddâm vuuʹdi õhttsaž såbbren. Sääʹmlääʹjj meâldlaž kueʹllǩeâmppvuõiggâdvuõtt lij miʹjjid miârkteei kulttuurlaž ouddõs da linnjummuž taarbaš õutstõõzz vuäinalm, tõn vuäǯǯ pueʹrmõsân vuâđđjuurdlaž saǥstõõllmõõžžâst siidsåbbrest. Aanrest såbbar jäʹrjstet jååʹttemõhttvuõđi diõtt, mušttal saaʹmi ouddooumaž Veikko Feodoroff.
Saaʹmi siidsååbbar lij saaʹmi äʹrbbvuõđlaž jiõččvaaldšemriâšldõk, kååʹtt lij juätkkam toiʹmmjummšes õutstõõzz seʹst čueʹđid eeʹjjid. Sääʹmvuuʹd siidin õnnum siidsåbbar lie vaaldšemriâšldõõǥǥ ââʹlmõs tuʹmmjeei orgaan, koin tuejjeet vääžnmõs linnjõõzzid saaʹmid kuõskki veiddsõs leʹbe vuâđđjuurdlaž aaʹššin. Sääʹmlääʹjj meâldlânji juõʹǩǩ eeʹjj jäʹrjstum siidsåbbri lââʹssen vueiʹtet taarb mieʹldd jäʹrjstet pâiʹlmeärrsaž siidsåbbrid da siidsåbbar vueiʹtte noorrõõttâd õhttsaž såbbra še mieʹrreed kuhttu siid kuõskki õhttsaž aaʹššin.
Pâiʹlmeärrsaž siidsåbbrest saǥstõõlât še koltta-sääʹn âânnmõõžžâst. Saǥstõõllmõš ääʹššest lij jåʹttjam Irja Jefremooff saaʹmi tuõttvuõtt- da suåvâdvuõttkomissiooʹje tuejjeem pååđčiõlǥtõõzz õlmstâttmõõžž mâŋŋa.
– Pååđčiõlǥtõõzz õlmstâʹttem õhttvuõđâst mainste, što ääʹššest âlgg saǥstõõllâd sääʹmõutstõõzzâst. Eʹtǩǩõs lij kaggâm jiânnai saǥstõõllmõõžž da sääʹmsuåvtõõzz mieʹrree viikkâd ääʹšš õhttsaž siidsåbbra saǥstõõllâmnalla. Eʹtǩǩõs lij kaggâm ouʹdde jiõččvälddsaž da čõnnsateʹmes Säʹmmlai tuõttvuõtt- da suåvâdvuõttkomissio pååđčiõlǥtõõzzâst. Ǩiõččâm eʹtǩǩõõzz nuʹtt miârkteei äʹššen, što tõʹst âlgg vuäǯǯad õutstõõzz vuäinalm, Veikko Feodoroff särnn.
Såbbrest vaʹlljeet ođđ väärrvuäzzla Njauddâm vuuʹd sääʹmsuåvtõʹsse čåuddõõttâmraukkmõõžžâs kuâđđam väärrvuäzzla sâjja.
Njeäʹllem-Keväjääuʹr da Njauddâm vuuʹdi saaʹmi siidsåbbri õhttsaž sååbbar jäʹrjstet sueʹvet 27.9.2025 čiâss 12.00 ääʹljeeʹl Aanrest Sääʹmvuuʹd škooultemkõõskõõzz Lassikuäʹđest (Menesjärventie 4).
Lââʹssteâđ: Saaʹmi ouddooumaž Veikko Feodoroff, teʹl. 050 396 1297
Saaʹmi siidsååbbar
Saaʹmi siidsååbbar lij saaʹmi äʹrbbvuõđlaž jiõččvaaldšemriâšldõk, kååʹtt lij juätkkam toiʹmmjummšes õutstõõzz seʹst čueʹđid eeʹjjid. Saaʹmi siidsåbbar seuʹrrai da veekk ooudâs saaʹmi vuõiggâdvuõđi teâuddjummuž da lij saaʹmi veerǥlaž eeʹtǩǩeei.
Saaʹmi siidsåbbar vääžnmõs tuejj lij saaʹmi äʹrbbvuõđlaž jieʹllemvueʹjji da jieʹllemåårrmõõžži di sääʹmǩiõl da -kulttuur tuõʹllʼjummuš da ooudâs viikkmõš.
Ânnʼjõžääiʹj siidsååbbar-riâšldõk âânn seʹst sääʹmsiidi õhttsaž siidsåbbar, kook lie riâšldõõǥǥ ââʹlmõs mieʹrreei orgaan, di såbbrin kooum eeǥǥas vuârstes vaʹlljuum siidi sääʹmsuåvtõõzz. Siidsååbbar-riâšldõõǥǥ jååʹđat saaʹmi ouddooumaž, koon vaʹlljeet vaalin koumm eeʹjj kõõskin. Tän lââʹssen Saaʹmi siidsåbbrest reâugg piisar.
Siidsåbbar
Njeäʹllem-Keväjääuʹr da Njauddâm sääʹmvuuʹdin ââʹnet vuuʹdest jälsteei saaʹmi õhttsaž siidsåbbar uuʹccmõsân õõut vuâra eeʹjjest. Tän lââʹssen taarb mieʹldd vueiʹtet jäʹrjsted jeeʹres såbbrid še. Taarb mieʹldd vueiʹtet jäʹrjsted vuuʹdi õhttsaž siidsåbbar, jõs ǩiõttʼtõõllâmnalla lij obb vuuʹd kuõskki veiddsõs leʹbe vuâđđjuurdlaž äʹšš.
Siidsåbbar lie vaaldšemriâšldõõǥǥ ââʹlmõs tuʹmmjeei orgaan. Siidsåbbrin tueʹjjeet vääžnmõs linnjummšid saaʹmid kuõskki veiddsõs da vuâđđjuurdlaž aaʹššin di ouddmiârkkân vaʹlljeet sääʹmsuåvtõõzzid da vaal-luʹvddkååʹdd.
Mieʹrreemvääʹld siidsåbbrin vueiʹtte ââʹnned såbbra vuässõõtti tiuddâkksa siidâst põõššinalla jälsteei sääʹm da siʹjji pieʹllkueiʹm. Jõs såbbrest ǩiõttʼtõõllâm vuâlla åårrai äʹšš kuõskat jeeʹres oummu ouddõõzzid leʹbe vuõiggâdvuõđid, lij suʹst peäggtum vueʹzzin vuäittmõš vuässõõttâd såbbra da ââʹnned särnnamvääʹld toʹben. Siidsååbbar lij mieʹrreemvääldlaž, ko pääiʹǩ âʹlnn lie 10 tiuddâkksa siidâst põõššinalla jälsteei sääʹm leʹbe siʹjji pieʹllkueiʹm.
Njeäʹllem-Keväjääuʹr da Njauddâm vuuʹdi saaʹmi siidsåbbri õhttsaž såbbar äʹššlistt
1 § Såbbar äävummuš
2 § Såbbar lääǥǥlažvuõtt da mieʹrreemvääʹldlažvuõtt
3 § Såbbar riâššõõttmõš
4 § Äʹššliist priimmʼmõš såbbar tuâjjriâššmõššân
5 § Rätkkjummuž miõttmõš Njauddâm vuuʹd sääʹmsuåvtõõzz väärrvuäzzlažvuõđâst
6 § Ođđ väärrvuäzzla vaʹlljummuš Njauddâm vuuʹd sääʹmsuåvtõʹsse
7 § Sääʹmlääʹjj meâldlaž ǩeâmpplooʹvi miõttmõõžž vuâđđjurddi
8 § Saaʹmi siidsåbbra kuulli arkiivmateriaal noorrmõš
9 § Teâđtem- da iʹlmmtemääʹšš
10 § Jeeʹres ääʹšš
11 § Såbbar jõskkmõš