Saaʹmi siidsåbbar noorrâʹtte täʹlvvmannu peäʹlrääʹjest Njeäʹllmest da Čeʹvetjääuʹrest
Njeäʹllem-Keväjääuʹr vuuʹd saaʹmi siidsååbbar lij sueʹvet 14.2. Njeäʹllmest da Njauddâm vuuʹd saaʹmi siidsååbbar lij pâʹsspeeiʹv 15.2. Čeʹvetjääuʹrest. Såbbrin saǥstõõlât ääiʹjpoddsaž aaʹššin di vaʹlljeet vaal-luʹvddkååʹdd saaʹmi ouddoummuvaalid, koid tååimtet taʹnni.
Täʹlvvmannu peäʹlrääʹjest Njeäʹllmest da Čeʹvetjääuʹrest jäʹrjstet saaʹmi siidsåbbrid, koin saǥstõõlât da linnjeet vuâđđjuurdlaž da veiddsõs aaʹššin. Saǥstõõllâmnalla lie saaʹmi vuõiggâdvuõđi teâuddjummuš mäddvuäǯǯamproseeʹssin da antropoloog Tim Ingold sääʹmõutstõʹsse ouddam Sääʹmarkiiʹve ruõkkum arkiivmateriaal ââʹnnemlååʹv miõttmõõžž vuâđđjurddi da vuäittmõš digitâʹstted materiaal.
Såbbrin linjjeet sääʹmlääʹjj 9 §:ff meâldlaž kueʹllǩeâmppooccmõõžži miõttmõõžž vuâđđjurddjin. Ääʹšš leäi jurddum ǩiõttʼtõõllâd obbvuõttâd čõhččmannust 2025 Aanra noorrõttum sääʹmvuuʹd õhttsaž siidsåbbrest. Ko sååbbar ij leämmaž Njeäʹllem-Keväjääuʹr vuuʹd peäʹlest mieʹrreemvääldlaž, âlgg ääʹšš puʹhtted ååʹn kuhttu vuuʹdi siidsåbbrid ǩiõttʼtõõllâmnalla.
Säʹmmlai tuõttvuõtt- da suåvâdvuõttkomissio tuâjj puuʹđi da komissio uuʹdi lopprapoortâs riikksuåvtõʹsse, sääʹmtegga da saaʹmi siidsåbbra rosttovmannust 2025. Lopprapoort siiskõõzzâst da tåimmeʹtǩǩõõzzin saǥstõõlât siidsåbbrin. Lââʹssen såbbrin vaʹlljeet vuäzzlaid da väärrvuäzzlaid vaal-luʹvddkådda taʹnni tååimtum saaʹmi ouddoummuvaali vääras. Njauddâm vuuʹd såbbrest vaʹlljeet še ođđ vuäzzla Njauddâm vuuʹd sääʹmsuåvtõʹsse čåuddõõttâmraukkmõõžžâs kuâđđam vuäzzla sâjja.
Saaʹmi siidsååbbar lij saaʹmi äʹrbbvuõđlaž jiõččvaaldšemriâšldõk, kååʹtt lij juätkkam toiʹmmjummšes õutstõõzz seʹst čueʹđid eeʹjjid. Sääʹmvuuʹd siidin õnnum siidsåbbar lie vaaldšemriâšldõõǥǥ ââʹlmõs tuʹmmjeei orgaan, koin tuejjeet vääžnmõs linnjõõzzid saaʹmid kuõskki veiddsõs leʹbe vuâđđjuurdlaž aaʹššin. Mieʹrreemvääʹld siidsåbbrin vueiʹtte ââʹnned såbbra vuässõõtti tiuddâkksa siidâst põõššinalla jälsteei sääʹm da siʹjji pieʹllkueiʹm. Siidsååbbar lij mieʹrreemvääldlaž, ko pääiʹǩ âʹlnn lie 10 mieʹrreemvääldlaž vuässõõđi.
Njeäʹllem-Keväjääuʹr saaʹmi siidsååbbar ââʹnet sueʹvet 14.2.2026 ääʹljeeʹl čiâss 13.00 Njeäʹllem sieʹbrpõõrtâst (Siikajärventie 40).
Njauddâm vuuʹd saaʹmi siidsååbbar ââʹnet pâʹsspeeiʹv 15.2.2026 ääʹljeeʹl čiâss 13.00 Čeʹvetjääuʹr škooulâst (Sevettijärventie 9076).
Saaʹmi siidsååbbar
Saaʹmi siidsååbbar lij saaʹmi äʹrbbvuõđlaž jiõččvaaldšemriâšldõk, kååʹtt lij juätkkam toiʹmmjummšes õutstõõzz seʹst čueʹđid eeʹjjid. Saaʹmi siidsåbbar seuʹrrai da veekk ooudâs saaʹmi vuõiggâdvuõđi teâuddjummuž da lij saaʹmi veerǥlaž eeʹtǩǩeei.
Saaʹmi siidsåbbar vääžnmõs tuejj lij saaʹmi äʹrbbvuõđlaž jieʹllemvueʹjji da jieʹllemåårrmõõžži di sääʹmǩiõl da -kulttuur tuõʹllʼjummuš da ooudâs viikkmõš.
Ânnʼjõžääiʹj siidsååbbar-riâšldõk âânn seʹst sääʹmsiidi õhttsaž siidsåbbar, kook lie riâšldõõǥǥ ââʹlmõs mieʹrreei orgaan, di såbbrin kooum eeǥǥas vuârstes vaʹlljuum siidi sääʹmsuåvtõõzz. Siidsååbbar-riâšldõõǥǥ jååʹđat saaʹmi ouddooumaž, koon vaʹlljeet vaalin koumm eeʹjj kõõskin. Tän lââʹssen Saaʹmi siidsåbbrest reâugg piisar.
Siidsåbbar
Njeäʹllem-Keväjääuʹr da Njauddâm sääʹmvuuʹdin ââʹnet vuuʹdest jälsteei saaʹmi õhttsaž siidsåbbar uuʹccmõsân õõut vuâra eeʹjjest. Tän lââʹssen taarb mieʹldd vueiʹtet jäʹrjsted jeeʹres såbbrid še. Taarb mieʹldd vueiʹtet jäʹrjsted vuuʹdi õhttsaž siidsåbbar, jõs ǩiõttʼtõõllâmnalla lij obb vuuʹd kuõskki veiddsõs leʹbe vuâđđjuurdlaž äʹšš.
Siidsåbbar lie vaaldšemriâšldõõǥǥ ââʹlmõs tuʹmmjeei orgaan. Siidsåbbrin tueʹjjeet vääžnmõs linnjummšid saaʹmid kuõskki veiddsõs da vuâđđjuurdlaž aaʹššin di ouddmiârkkân vaʹlljeet sääʹmsuåvtõõzzid da vaal-luʹvddkååʹdd.
Mieʹrreemvääʹld siidsåbbrin vueiʹtte ââʹnned såbbra vuässõõtti tiuddâkksa siidâst põõššinalla jälsteei sääʹm da siʹjji pieʹllkueiʹm. Jõs såbbrest ǩiõttʼtõõllâm vuâlla åårrai äʹšš kuõskat jeeʹres oummu ouddõõzzid leʹbe vuõiggâdvuõđid, lij suʹst peäggtum vueʹzzin vuäittmõš vuässõõttâd såbbra da ââʹnned särnnamvääʹld toʹben. Siidsååbbar lij mieʹrreemvääldlaž, ko pääiʹǩ âʹlnn lie 10 tiuddâkksa siidâst põõššinalla jälsteei sääʹm leʹbe siʹjji pieʹllkueiʹm.
teʹkstt: Saaʹmi siidsååbbar
Lââʹssteâđ: Saaʹmi ouddooumaž Veikko Feodoroff, teʹl. 050 396 1297