Sääʹmkulttuurfondd ooudâsveekk jiiʹjjes siiskâž toiʹmmjummuž da halltõstuej
Sääʹmkulttuurfoond siiskâž toiʹmmjummuž ooudâsviikkmõš lij leämmaž Sääʹmkulttuurfoond õhtt vääžnmõs tååimain eeʹjjest 2024 ääʹljeeʹl di ânnʼjõž halltõspââʹj õhtt vääžnmõs teeʹmin. Toiʹmmjummuž ooudâsviikkmõš kuâskk jm. halltõstuej, siiskâž vaaldâšm, reâuggkõskkvuõđid, Sääʹmkulttuurfoond äärvaid da saakkummuž. Oouʹdeemtååimai täävtõsân lij raajjâd Sääʹmkulttuurfoond tuej da toiʹmmjummuž nâânas vuâđ õõl, što vueiʹtet ainsmâʹtted toiʹmmjummuž juätkkjemvuõđ pueʹttiääiʹjest di pueʹreed Sääʹmkulttuurfoond toiʹmmjemoudldõõzzid da vuäittmõõžžid kuʹǩes ääiʹj seʹst.
Reâuggkõskkvuõđid kuõskki tååimain leäʹt jeäʹrbi mieʹldd čiõlǥääm tuejjlai tuejjkoovid, koon diõtt tuejjnõmmõõǥǥ še lie mottjam. 21.4.2026 ääʹljeeʹl Sääʹmkulttuurfoondâst lie tuejast tåimmjååʹđteei da tällõsäʹšštobddi. Sääʹmkulttuurfoond halltõs mieʹrrii juʹn čâhčča 2024 muʹtted äʹššoummu tuejjnõmmõõǥǥ tåiʹmmjååʹđteeʹjen, peʹce mieʹrrii, što ođđ nõmmõõǥǥ vääʹldet âânnma eman teʹl, ko tuejjkoovid pââʹstet peeiʹvted suåppmõõžžid še. Äʹššooumaž-nõmmõk puätt vuäʹmm fonddlääʹjjest (lääddas säätiölaki), leša lääʹjj oođummuž eeʹjj 2015 lij vueiʹtlvâsttam tuejjnõmmõõǥǥ muttmõõžž tåimmjååʹđteeʹjen, kååʹtt pueʹrben mušttal tuej siiskõõzzâst. Pueʹttivuõđâst õhttsažtuejj jeeʹres organisaatioivuiʹm še lij hiâlpab, ko tuejjnõmmõk šeâtt pueʹrben tän äigga.
Tän eeʹjj aalǥâst Sääʹmkulttuurfoond halltõs mieʹrrii muʹtted ääiʹjben tällõs- da toiʹmmjemassisteeʹnt nõmmõõǥǥin tåimmam haʹŋǩǩõsnallšem tuej tällõsäʹšštobddjen, koon reâuggkõskkvuõtt lij ååʹn põõššinallšem. Muuttâs šõõddi viõʹǩǩe tällõsäʹšštobddi rekrytâsttmõõžž õhttvuõđâst ođđeeʹjj-tälvvmannust 2026. Sääʹmkulttuurfoond toiʹmmjummuš vuäǯǯ juätkkjem- da nâânasvuõđ, ko tällõsäʹšštobddi tuejj še lij põõssi reâuggkõskkvuõtt.
Siiskâž vaaldâšm da halltõstuej ooudâsviikkmõõžž täävtõsân lij õinn pueʹrben vuäǯǯad halltõõzz čõnnõõttâd foond toiʹmmjummša di hiâlpeed halltõõzz tuʹmmstõktuej da vaaldšemtääʹzz tuej. Täävtõʹsse kuåsttâm diõtt raajât šiõttlõs vaaldâšm vuäʹppõõzzid, kook ouʹdde nuʹtt tuejjlaid ko še halltõʹsse čiõlgg toiʹmmjem-maallid tuõjju määŋg jeeʹres tääʹzzest.
Äärvaid da saakkummuž kuõskki ooudâsviikkâmtuejj jåʹtte ǩiõtt ǩiõđâst da pâi-i jeäʹlle ääiʹjest. Ärvvreâuggmõõžž kõskksaž täävtõs lij vuäǯǯad čiõlgg fiʹttjõõzz Sääʹmkulttuurfoond toiʹmmjummuž oʹhjjeei prinsiippin leʹbe vuâđđjurddjin; äärv ohjjee organisaatio toiʹmmjummuž di mušttle åålǥpeälla še organisaatiost, tõn toiʹmmjummšest, toiʹmmjemnaaʹlin da tõõzz vääžnai aaʹššin. Ärvvreâuggmõš lij alttuum tuejjlažkooʹddin čâhčča 2025 da tõn jueʹtǩet pueʹtti čõõuč. Čâhčča ärvvreâuggmõʹšše vuässâʹtte Sääʹmkulttuurfoond halltõs da tuejjla, mõõn lââʹzzen sääʹmõutstõõzz vääʹldet še mieʹldd tuʹmmjed Sääʹmkulttuurfoond äärvaid. Õutstõõzz haaʹleet väʹldded tuõjju mieʹldd, što Sääʹmkulttuurfoondâst leʹčče nuʹvddem äärv, kook õutstõõzz miõlâst še lie vääžnai da koid õutstõs še åskk.
Saakkummuž kuõskki ooudâsviikkâmtuejj vuâđđââvv eeʹjj 2025 tåimmplaaʹne, koʹst lij liʹnjjʼjum Sääʹmkulttuurfoond saakkeemstrategia raajjmest. Saakkeemstrategiast liʹnjjʼjet foond täävtõõzzid saakkummša nuʹtt åålǥlaž ko še siiskâž saakkummšest. Tåimmplaan meâldlânji saakkeemstrategia raajjmõš lij alttuum teimma, da tõʹst lie meäʹrtõllum jm. saakkummuž ânnʼjõž vueʹǩǩ da oouʹdeemnallšem ääʹšš, ââʹnnemnallšem saakkeemkanaal da media, täävtõõzz di õhttsažtuejj- da täävtõsjoouk. Saakkeemstrategia ooudâsviikkmõš kaiʹbbai tuärjjan kuuitâǥ äärvai meäʹrtõõllmõõžž, kooi mieʹldd vueiʹtet jm. meäʹrtõõllâd saakkummuž vääžnmõs siiskõõzzid da vuâđđjurdjid.
Ooudâsviikkâmtuejj lij tuejjuum tuejjlažkååʹdd da halltõõzz nâânas õhttsâžtuejjan.