Sääʹmkulttuurfoond Sääʹmpääʹljes-haʹŋǩǩõs lij älggam – haʹŋǩǩõstuejjliʹžžen lij alttääm Mirkka Ollila
Lääʹddjânnam Kulttuurfondd miõđi Sääʹmkulttuurfoʹndde Harry Hendunen foondâst leʹbe teäʹǧǧruõkkõõzzâst 80.000 euʹrred Sääʹmpääʹljes-haʹŋǩǩõʹsse, koon mieʹrren lij seʹlvvted sääʹmǩiõl vueʹjj da ǩiõl ââʹnnem õudldõõzzid läʹddlaž õhttsažkååʹddest. Haʹŋǩǩõs lij älggam njuhččmannu looppâst 2025.
Haʹŋǩǩõõzz čiõlǥtõõzz vuõigg täävtõsân lij vuäǯǯad tiiudâskoov ǩiõllmainsteeʹjin, ǩiõllââʹnnemvuäittmõõžžin da -areenain di tobdsted tõid vaʹǯǯtõõzzid, kook miâlǥee leʹbe câʹǧǧe ǩiõl serddmõõžž, ââʹnnmõõžž leʹbe jieʹllemviõkkjen seillmõõžž. Čiõlǥtõõzz vuâđald tobdstet tän ääiʹjest pueʹrmõsân vaaikteei da vääžnʼjumus ǩiõlljeälltemtååimaid. Čiõlǥtõõzz viiǥǥât čõõđ čõõnâsjoukkõhttsaztuej äuʹǩǩen ââʹneeʹl õutstõõzz seʹst nuʹtt, što čiõlǥtõõzz vueʹlǧǧemsââʹjjen lie õutstõõzz taarb. Haʹŋǩǩõs pohtt teâđ sääʹmõutstõõzz ââʹnnma di vueiʹtlvâstt kuʹǩesäiggsaž da jeeʹres toiʹmmjeeʹjid da čõõnâsjooukid õhtteei ǩiõlljeälltemstrategia raajjmõõžž. Haʹŋǩǩõõzz looppâst viiǥǥât čõõđ še måtam konkreettlaž tååim, koon veäkka smeʹllkââʹttet tååimai toiʹmmepiijjmõʹšše.
Sääʹmkulttuurfondd ooʒʒi haʹŋǩǩõstuejjla Sääʹmpääʹljes – Čiõlǥtõs sääʹmǩiõl vueʹjjest Lääʹddjânnmest -haʹŋǩǩõʹsse 14 määnpââʹj ääiǥas. Tuejjpäiʹǩǩ leäi ooccâmnalla 19.3.2025–4.4.2025. Vuõss-sââʹjest tuõjju oʹcceš tuʹtǩǩeei, koʹst lij ââʹnteei õllškooultuʹtǩǩõs, ǩiõččlâsttmõš tuʹtǩǩeem-/čiõlǥtemtuejast, kvaliittlaž aunstõõzz analysâʹsttmest da raportâʹsttmest di šiõǥǥ saaǥǥtem- da vuârrvaaiktemtääid. Ooccâmäiʹǧǧen puõʹtte õhttsiʹžže 11 ooccmõššâd, mainstâʹttmõʹšše koččus ooccjin nellj. Mainstâttmõõžži mâŋŋa õhtt ooccjin ǩieʹzzi ooccmõõžž meädda. Tuõjju vaʹlljeeš valdiatiõtti maisteeʹr da näggtõsǩeʹrjjtuʹtǩǩeei Mirkka Ollila. Ollila lij alttääm tuejast 28.4.2025.
Ollila lij ääiʹjben tuʹtǩǩääm jm. byrokraattlaž cõgldõõzzid, kook lie puättam kuâllõksäʹmmlain vuâstta, ko sij lie põrggâm tuõʹllʼjed vuõiggâdvuõđas jiõččmieʹrrummša da -valdšma di äʹrbbvuõđlaž jieʹllemvueʹjjid Sääʹmjânnam nuõrtmõš vuuʹdin di Kuâllõknjaarǥâst leävvneei ”ruânn” kuåivâstoiʹmmjummuž, tõõzz õhttneei proseeʹssid da säʹmmlai vuäittmõõžžid vuässõõttâd tuʹmmstõktuejjproseeʹssid. Vueʹssen suu näggtõsǩeʹrjjtuej son analysâstt aarktlaž algmeerai marginalisâʹsttmõõžž da panntääʹssteäddsaž väʹlddkõskkvuõđid Kuâlõõǥǥâst.
Sääʹmpääʹljes-haʹŋǩǩõõzz son vuäinn miârkteei tåimman sääʹmǩiõl sââʹj nâânummšest da ǩiõlltuej vaaikteeivuõđ lââʹzztummšest. Ollila vuäinn, što samai vääžnai lij tobdsted ǩiõllõutstõõzz – tõt vieʹǩǩat fiʹttjed jieʹllemviõǥǥ tuärjjeei aaʹššid di vueiʹnned da ǩiõččlâʹstted tõid vaʹǯǯtõõžžid, kook vaaikte ǩiõl serddmõʹšše. ”Haʹŋǩǩõs pohtt õʹhtte teâđ, toiʹmmjeeʹjid da vuäinlmid, koi vuâđald vuäitt raajjâd ǩeâllʼjeei ǩiõllpoliittlaž čåuddmõõžžid da strategiaid. Leäm samai späʹssballaš tõʹst, što vuäǯǯam leeʹd tuejjeʹmmen tän tuej, koon vuâđđan lie õutstõõzz taarb da tuõivvi”, Ollila ǩeäss õʹhtte jurddjees haʹŋǩǩõõzzâst.
Sääʹmpääʹljes-haʹŋǩǩõs lij Lääʹddjânnam Kulttuurfoond teäggtam, Sääʹmkulttuurfoond vaaldšam haʹŋǩǩõs, koon plaanuum peštt lij 14 määnpââʹjjed da tõn viiǥǥât čõõđ 28.4.2025–30.6.2026. Haʹnǩǩõõzz viiǥǥât čõõđ šiõǥǥ õhttsažtuejast Saaʹmi siidsåbbrin, koon lââʹzzen oʹhjjeemjoukk oʹhjjad haʹŋǩǩõõzz tuej. Oʹhjjeemjooukâst lie Sääʹmkulttuurfoond da Saaʹmi siidsåbbar lââʹzzen mieʹldd vuõiggâdvuõttministeria, Lääʹddjânnam Sääʹmteʹǧǧ, Sääʹmvuuʹd škooultemkõõskõs, Oulu universiteeʹtt Giellagas-institutt, Sääʹm Ǩiõllkaʹlddi, Sääʹm psykososiaalʼlaž tuärj juâǥǥas Uvjj da Äʹvv – sääʹm-muʹzei.
