Saaʹmi siidsååbbar eʹtǩǩad Irja Jefremooff säʹmmlai tuõttvuõtt- da suåvâdvuõttkomissio vuäzzliʹžžen

Njeäʹllem-Keväjääuʹr da Njauddâm vuuʹdi sääʹmsuåvtõõzz tuʹmmje rosttovmannu 9. peeiʹv õnnum såbbreʹstes eʹtǩǩeed Saaʹmi siidsåbbar peäʹlest riikksuåvtõʹsse Säʹmmlai tuõttvuõtt- da suåvâdvuõttkomissio vuäzzliʹžžen vaaldšemtiõʹđi maister Irja Jefremooff.

Saaʹmi siidsååbbar raauki eʹtǩǩõõzzid säʹmmlai tuõttvuõtt- da suåvâdvuõttkomissio vuäzzliʹžžen leʹbe komissaarân vueʹssmannu 17. peivva mõõneeʹst. Mieʹrräigga mõõneeʹst Saaʹmi siidsåbbra puõʹtte kueʹhtt eʹtǩǩõõzz. Kuhttu eʹtǩǩõõzzâst eʹtǩǩeeš Irja Jefremooff säʹmmlai tuõttvuõtt- da suåvâdvuõttkomissio vuäzzliʹžžen.

Ouddâl eʹtǩǩõõzzi raukkmõõžž Njeäʹllem-Keväjääuʹr da Njauddâm vuuʹdi saaʹmi siidsåbbar leʹjje tuʹmmjam, što eʹtǩǩõõzzid puuʹtet ǩiõttʼtõõllâmnalla vuuʹdi õhttsaž saaʹmi siidsåbbra, koʹst tuʹmmjet õõut komissaar eʹtǩǩummšest riikksuåvtõʹsse. Koronavirusvueʹjj diõtt Saaʹmi siidsåbbra tueʹjjuum komissaareʹtǩǩõõzzid ǩiõttʼtõʹlleš õhttsaž siidsåbbar sââʹjest Njeäʹllem-Keväjääuʹr da Njauddâm vuuʹdi sääʹmsuåvtõõzzi õhttsaž såbbrest.

Tuõttvuõtt- da suåvâdvuõttproseeʹss mieʹrren lij aiccâd da ärvvtõõllâd historiallaš da ânnʼjõž čårstummuž, mieʹldd looǥǥeeʹl riikk suddeempolitiikk, di vuõiggâdvuõđi neuʹrrummšid, čiõlǥted mäʹhtt täk vaaikte säʹmmlaid da sij õõutstõʹsse ânnʼjõž vueʹjjest da eʹtǩǩeed, mäʹhtt vuäitčeš oouʹdeed õhttvuõđ säʹmmlai da Lääʹddjânnam riikk kõõsk di säʹmmlai kõõskâst.

Komissiost âʹlǧǧe leeʹd vuäzzla, koin lij spesiaalsilttummuš säʹmmlai jeälain, ǩiõlâst da kulttuurâst. Komissio meäʹrat riikksuåvtõs nâânn õhttsažtuâjast sääʹmtiiʹǧǧin da saaʹmi siidsåbbrin. Komissiost lie vitt komissaar, koin kueʹhtt vaʹlljeet riikksuåvtõõzz eʹtǩǩõõzzâst, kueʹhtt Sääʹmteeʹǧǧ eʹtǩǩõõzzâst da õhtt Saaʹmi siidsåbbar eʹtǩǩõõzzâst.

Lââʹssteâđ:

saaʹmi ouddooumaž Veikko Feodoroff, teʹl. 050 396 1297

Saaʹmi siidsååbbar | Kolttien kyläkokous

Jeeʹres ođđâz:

Sääʹmsuåvtõõzz ǩiõttʼtâʹlle Saaʹmi siidsåbbra tueʹjjuum eʹtǩǩõõzzid säʹmmlai tuõttvuõtt- da suåvâdvuõttkomissio vuäzzliʹžžen rosttovmannust

Ääiʹj eʹtǩǩeed vuäzzlaid Säʹmmlai tuõttvuõtt- da suåvâdvuõttkomissiooʹje jueʹtǩet

Saaʹmi siidsååbbar räukk eʹtǩǩõõzzid Säʹmmlai tuõttvuõtt- da suåvâdvuõttkomissio vuäzzliʹžžen